Mugertza Krosa Marrazki Lehiaketa

Badator badator! Mugertza Kroseko marrazki lehiaketa! Nahi duenak parte-hartu dezake eta urtarrilak 7an ikastolara ekarri beharko du bere lana.  Ikusi jarraian lehiaketaren oinarriak:

II. MARRAZKI LEHIAKETA

LXXIV. JUAN MUGUERZA KROSA 2019

OINARRIAK:

ANTOLATZAILEAK: Mintxeta Atletismo Taldea eta Elgoibarko Udaleko Haur, Nerabe eta Gazteen Sustapeneko Saila.

PARTE-HARTZAILEAK: Lehiaketa honetan, Elgoibarko 6 eta 12 urte bitarteko edozein haurrek har dezake parte.

GAIA: 2019ko LXXIV. Juan Muguerza Krosa, herriaren eta lasterketaren arteko harremana.

MODALITATEA: Lanen aukeraketa errazteko, marrazkiak 220 x 300 milimetroko (DIN A4) lamina normalizatuetan aurkeztu beharko dira (paperean edo kartulinan).

Teknika librea izango da; kolorezko arkatzak, errotuladoreak, tintak, akuarelak, collagea e.a. erabili ahal izango dira.

AURKEZTEKO EPEA: 2019ko urtarrilaren 8a.

AURKEZTEKO LEKUA: Udaleko Haur, Nerabe eta Gazteen Sustapeneko Saila.

LANAK: Partaide bakoitzak, gehienez lan bat aurkeztu ahal izango du. Lanek originalak izan beharko dute. Ezin dira aurkeztu beste lehiaketa batean saritutako lanak.

LANEN IDENTIFIKAZIOA: Marrazki bakoitzaren atzean izenburua edo leloa bakarrik jarriko da.

EPAIMAHAIA: Mintxeta Atletismo taldeko kide bat, Udaleko Haur, Nerabe eta Gazteen Sustapeneko Teknikaria, Ludotekako Koordinatzailea eta marrazketan aditu bat.

IRABAZLEAREN IZENA: Epaimahaiaren erabakia irabazleei zein hedabideei jakinaraziko zaie.

MAILAK ETA SARIAK: Aurkeztutako lanen aukeraketan adina eta ikasketa maila izango dira kontuan. Lanaren alderdi hezitzailea ere baloratuko da. Lehiaketan, bestalde, ondorengo mailak izango dira:

1- Lehen Hezkuntzako 1. eta 2. mailako ikasleak.

2- Lehen Hezkuntzako 3. eta 4. mailako ikasleak.

3- Lehen Hezkuntzako 5. eta 6. mailako ikasleak.

Saria: Maila bakoitzean bi sari egongo dira. Sariak herriko kirol dendetan erabiltzeko erosketa txartelak izango dira.

SARI BANAKETA: 2019ko urtarrilaren 12an izango da, 19:30ean, Udaletxean 2017ko Juan Muguerza Kroseko korrikalarien aurkezpena baino lehen.

ERAKUSKETA: Saritutako marrazkiak Kiroldegian egongo dira ikusgai, otsailaren 1etik 28ra bitartean.

LANAK JASOTZEKO EPEA: Marrazki sarituak antolatzaileen esku geratuko dira, eta horiek izango dira marrazkiak argitaratzeko eskubidea izango dutenak, betiere, egilearen izena aipatuta. Saritu gabeko lanak Udaletxean jaso ahal izango dira.

OINARRIAK ONARTZEA: Lehiaketa honetan parte-hartzeko, oinarri hauek guztiak onartu beharko dira.

Denda Jolasa

Zenbat eta errealagoa orduan eta esanguratsuagoa. Eguneroko bizitzan gure haurrak dirua maneiatzen hasten dira. Baina ohartzen al dira egiten ari direnaz? Erosketa txikiak egin eta zenbat diru eman eta bueltatzen diguten ikusi nahi izan dugu. Horretarako, ikastolan argazki eta txanponekin praktikatzen aritzen gara.

Txoko Zuria: Egipto

Dakizuen bezalaxe, une honetan Egipto gaia aitzakitzat hartuz, deskribapenak, geometria, hiztegi berria eta beste hainbat eduki eta konpetentzia lantzen ari gara. Horretarako, gela bakoitzean txoko zuri bat dugu. Honek esan nahi du, etxean gaiarekin harremana duen edozein objektu, informazio, errezeta edota jantzi badituzue, txoko honetan denon eskura jartzen ditugula. Haurrek ekarritakoa erakutsi eta horri buruz hitz egiten dute eta lagungarria izaten da beraien jakinmina hasetzeko. 

Orain arte horrela ditugu.

3A

3B

3C

Zerbait gehiago gehitzen lagunduko? Gaiarekin bukatzean etxera bueltatuko dute guztia. 

Zubiaz gozatu!

Euskararen Eguna

Astelehenean Euskaraldiari amaiera eman eta Euskararen Eguna ospatu genuen. Jai giroa izan genuen egun onsoan zehar. Argitxoren kantak abestu genituen, pregoia entzun, dantza egin, txokolatea jan eta hainbat jolasetan aritu. Primerako eguna benetan!

Euskaraldia!!

Euskaraldian gaude eta abenduak 3an, amaiera emateaz gain, euskararen eguna ospatuko dugu ikastolan. Horretarako, Euskaraldiaren abestia ikasteaz gain jo ta ke gabiltza dantzarekin. Entzun duzue abestia?

Anima zaitezte zuen txikiekin batera dantza ikasten. Astelehenerako jada ia prest dugu baina tira, entsegu apurtxo bat ez zaigu gaizki etorriko!!! 

Bukatzeko, eguna kolorez janzteko, ostiralerako kamiseta horia eta kateorratz bat ekarri beharko dute ikastolara. Kateorratza eskulantxo bat egiteko izango da eta kamiseta astelehenean dantza egiteko.

Emakumeen Kontrako Indarkeriaren Nazioarteko Eguna

Emakumeen Kontrako Indarkeriaren Nazioarteko Eguna aldarrikatu genuen pasa den ostiralean. Astean zehar laburmetraiak, irudiak eta hausnarketa ezberdinak egin genituek tratu onak zer diren ikustarazteko. Hau, ikastolako maila guztien artean sortutakoa.

SIMETRIA

Ikasturte honetan lehen aldiz simetria lantzeari ekin diogu. Haurren errealitate hurbila esanguratsuena da ezagutza hauek barneratzeko. Horregatik, modu bisualean simetria ulertzeko, beraien aurpegiak erabili ditugu. 

Erditik zatitu eta alde bakarra erabili dugu. Ondo behatu, eta falta zitzaigun erdia marraztu dugu. Orduan eztabaida ezberdinak sortu dira, "simetrikoak gara baina nik nakan hau ez daukat beste aldean" edo "gaur egun ez daukat hortz kopuru berbera bi aldeetan". Oso dibertigarria izan da jarduera eta hausnarketa polita egin dugu denon artean.

Animatzen zarete eguneroko objetuen simetriak topatzera? Zuen argazkiak igotzen hasi zaitezkete! Animatu!

Emakumeak eta Kirola

Ainhoa Lendinez eta Mayi Mujika mendi lasterkariak izan genituen gure artean. Larunbatean Karakate igoera dela aprobetxatuz, hitzaldi bat eman digute. Bertan,  Ainhoa eta Mayik eskola kirolean hasi zirenetik gaur egun arte izan duten kirol ibilbidea azaldu digute, eta hainbat alderdi lantzeko aukera izan dugu: Emakumeak eta kirola, esfortzuaren kultura, errespetua, media eta mendi lasterketak, etab. Hitzaldi honen helburua neskak eskola kirolean parte hartzera animatzea izan da.

Egunez-egun biderketa taulak ikasten bagoaz ere, modu manipulatiboan nola bidertu dezakegun ikusi dugu. Hortarako, etxetik dauzkagun materialak erabili daitezke. Ikusi nahi?

Taula inprimatu hemen, dadoak bota eta txitxirioekin hutsuneak betetzen joan.

Beraiek jada badakite nola jolastu, animatzen zarete elkarrekin praktikatzera?

BIDERKETA TAULAK INPRIMATZEKO

Kaixo lagunok!

Biderketa taulak ikasi behar ditugula eta, zer hobe, gure lagun berriekin batera egitea baino?

Hemen dituzue 1etik 10era bitarteko biderketa taulak.

Guk, dokumentua inprimatu, taulaz-taula moztu, plastifikatu eta giltzetako anilatxo batean sartzea proposaten dizuegu. Hartara, esku artean erabili arren, txukun mantenduko dira.

Ondo izan!

Urriak 23an LH3ko ikasleak Elgoibarko bazterrak detailez aztertzera abiatu ziren. Horretarako, aitzakia marrazketa izan zen. Horri esker, Udaletxeko armarriez ohartu ziren, baita ate eta leiho ezberdinez esaterako. 

Elizaren kasuan, galdera ugari sortu zitzaizkien, oso handia da, pisu asko izango ote ditu? Zer dira puntatxoak? Marraztu bitartean denon artean erantzuten joan ginen zalantzak.

Gure herriko bazterrak aztertzea dibertigarria eta interesgarria izan daiteke aldi berean!

Liburutegira Bisita

Urriak 10ean LH3ko ikasleak liburutegian izan ginen. Bertan, liburutegiko funtzionamendua azaldu ziguten, arauak ezagutu genituen eta gure adinerako egokiagoak diren liburuak zeintzuk diren gogorarazi ziguten. Primerako bisita izan zen!

Datorren astetik aurrera, gela bakoitzean bi motxilaibiltari izango ditugu. Astero ikasle bati dagokio motxila hori etxera eramatea. Bertan, hainbat liburu eta koaderno bat topatuko dituzue. Helburua, etxean ez dauzkagun liburuez gozatzeko aukera izatea da. Nahi bezalaxe irakurri dezakete, familian, anai-arrebei, gurasoek haurrei kontatzeko... Gozatzea da garrantzitsuena! Ondoren, haur bakoitzak koadernoan gustuko izan duena idatziko du, gustoko izan ez duena edota nola irakurri duen azaldu dezake.

Ondo izan!

Igeriketa

Pasatu dira 2 aste igeriketa hasi genuenetik. Gogotsu dabiltza ikastaroan eta abileziaz mugitzen dira uretan. Gogoratu azaroak 7 arte jarraituko duela ekintzak. Hemen dituzue talde ezberdinen argazkia.

Hurrengo arte!

3B

3C

3A

Dot Painting

Ezagutzen duzue Dot Painting teknika? Australiako aborigenek marrazteko erabiltzen zuten teknika da. Beraien istorioak kontatzeko erabiltzen zuten eta marrazkiak puntutxoen bitartez egiten zituzten,

Lehenago komentatu izan dizuegun bezalaxe, lehen unitate honetan "Gure Txoko Kuttuna" lantzen ari gara, hortaz, Elgoibarko txoko ezberdinak aztertzen gabiltza.

Plastikan ere, gertuko sinboloak, artelanak edota pertsonaiak ezagutu ditzaten nahi dugu. Hori dela eta, Sigmako josteko makiña izan da Dot Painting bitartez egin dugun marrazkia. 

Kiva Eguna

Aurreko ostiralean Kiva eguna ozpatu genuen ikastolan. Dakizuenez, Kiva programak Bullying-aren prebentzioan egiten du lan batik bat. Hori dela eta, urtero  bezala, haurrekin bullying-a zer den definitu dugu, nola prebenitu daitekeen aztertu etab. Bukaeran, eskolako pasabideetarako mezuak, oharrak eta irudiak egiten aritu gara. Hona hemen egindakoaren emaitza.

Errealitate Hurbila - Matematika

8 urterekin jada gai dira erosketa txikiak egiteko. Hori dela eta, lehenengo jolas sinbolikoa egin genuen beraien materialei prezioa jarri eta saltzaile edo erosle rola hartuz. 

Ondoren, esku hartean hasieran eta bukaeran gelditu zitzaigun dirua zenbatu genuen.

Bukatzeko, txanpon eta bileteak manipulatuz fitxa osatzen joan ziren. Lan ederra egiten ari dira neska mutil hauek!

Euskal Herriko Probintzia eta Hiriburuak

Aste hauetan, gure ingurua aztertzen dihardugu. Elgoibarko planoa aztertu, gure txoko kuttunak deskribatu eta Euskal Herriko mapa ezagutu. Datozen egunetan Euskal Herriko probintzia eta hiriburuak kokatzen arituko gara. 

Gelan, ezagutzera eman diegu webgune interesgarri bat. Educaplay du izena. Izenaren gainean sakatu eta hizkuntza aldatu. Euskara hautatu eta probintziak lantzeko makina jolas topatuko dituzte bertan. Probatu nahi?

Matematika Manipulatiboak

Egun hauetan ordularia lantzeari ekin diogu. Argi daukagu jolasa tresna bikaina dela ikasteko, beraz, dadoa eta erlojua esku artean hartu eta aurrera! Jolasa haurrentzako egoera naturala da eta matematika manipulatiboari esker, abstrakzioa alde batera utzi ete erreala bihurtzen dugu. Itxura ona du ezta?

Ongi Etorri!

Ongi etorri ikasturte berri honetara. Ikasturtean zehar gelan egiten ditugun ekintzen berri ematen joango gara blogean. Adi egon hurrengo egunetan azalduko diren argazki eta gertakarie. Astelehen ona izan!

ERREPASATZEKO GOMENDIOAK

MATEMATIKA

EUSKERA

Ondorengo dokumentuan abakandoari buruzko informazio-testua eta azalpen-testu bat ikus dezakezute. 

Bi testu motak aztertu ditugula, geureak sortzera ekin diogu. Lehenengo, informazioa bilketa egin dugu beheko informazio-testua osatzeko. Ondoren, informazio-testua bete dugula, azalpen-testua sortzeko prest gaude. Azkenik, ezinbestekoa da errepaso-lana egitea. 

ERREPASATZEKO GOMENDIOAK

MATEMATIKA

Problemak

Biderketa taulak errepasatu